Is butegas podint fai una parti manna po sa lìngua sadra, ca funt unu logu chi s'abitaus meda oras a sa di' e chi s'atobiaus a pari cumenti 'esseus de domu. Po cussu su progetu Sìnnia Bilìngua tenit una parti fata a posta po is butegas e totu, po chi 'essant unu logu chi sa genti podit chistionai e ligi su sadru.

Is butegheris podint apicai totu is cartellus scritus siat in italianu siat in sadru, cumenti is oràrius de obertura, is ofertas, sa cosa proibia, avisus e aici nendi. Fait a fai po fintzas is picigosus (adesivi), is insinnas, is eticheddas, is catàlogu e aici nendi. Totu custu traballu ddu fait s’Ufìtziu de sa Lìngua Sadra e is butegas no depint pagai nudda.

De custa bèndida fata in sadru puru is butegheris nci goràngiant luegus ca sa genti ddus biri prus a canta a issus, prus crarus e deretus cumenti chistiònat sa genti e totu. No est mancu po nudda ca sempri prus siendas ponint unu nòmini in sadru a sa cosa chi faint: diferentementi de su passau, oindi' scrint totus "pani carasau" e giai nisciunus "carta da musica", "culixonis" e no prus "ravioli di ricotta", "durches" e no prus "savoiardi di Fonni" e aici nendi..

Custu de bendi cun su sadru est una cosa aici de profetu ca funt ponendidda po fintzas po sa cosa chi no eus imbentau nosu sadrus. Is patateddas a fritu po is piciocheddus, a primu teniant sempri nòminis strangius ("dixi, charlie, sticch ... ") ma oindi' una sienda forti e arrica ddis at postu nòminis sadrus (in logudoresu): cròchias, moros, bastos e atrus. 'Olit nai ca ndi ddi 'enit cosa, de si nunca no dd'iant a fai.

Innoi podeis biri unus cantu dogumentus po custa chistioni:



- Una litra in sadru chi s'Assessori a su Compra-Bendi at mandau a is butegheris
- Su traballu po is butegas chi iat cumentzau s'Ofìtziu de sa Lìngua Sarda de su Comunu de Cuartu

- Una mirada de butegas amigas de su Sadru in totu sa Sardìnnia

A chini 'olit gosai de custu srebìtziu podit lassai su nòmini suu a s'Assessori a su Compra-Bendi o podit scriri in deretura a s'Ofìtziu de sa Lìngua Sadra. S'impreau de s'Ofìtziu dd'at a tzerriai e s'ant a ponni di acòrdiu po si biri e detzidi su traballu.

Totu is butegheris chi 'olint gosai de custu srebìtziu si scriant a Indirizzo e-mail protetto dal bots spam , deve abilitare Javascript per vederlo