Sa genti de Sìnnia at tentu sempri un’interessu mannu a sa lìngua naturali sua: sa lìngua sadra. Sa Giunta Comunali at sighiu cust’interessu giustu de sa genti e Sìnnia est bessiu unu de is Comunus de sa Sardìnnia prus faineris po sa defensa e su crescimentu de su sadru. At fatu e presentau progetus cun sa lei arregionali 26/97 e cun sa lei italiana 482/99, totus de profetu mannu e ki sa genti ddus aprètziat. Su pròpiu is scolas de Sìnnia, ki funt traballendi beni e ki si speraus arribint a lestru a sa tenta bera, ki est a imparai in sadru totu is disciprinas.

A oi, su traballu de su Comunu e de sa genti de Sìnnia po sa lìngua sadra e po su bilinguismu ddu podeus biri de custus fatus:

• Is librus in sadru de Giuanni (Giovanni) Cadeddu, predi sinniesu
• Is cantadas campidanesas in bidda po dònnia festa
• Sa scola po cantadoris/as
• Is discus e is cuntzertus de Maria Paola Aresu
• Su prèmiu literàriu sadru “Su Fermentu”
• Sa delibera ki at stabilèssiu s’importu de sa bariedadi sinniesa
• Is contus e is poesias in sadru de Fannieta Cocu (Fanny Cocco), bincidoras in prèmius de totu Sardìnnia.
• Su progetu “Sìnnia Bilìngua” de su Comunu
• Su giorronali Su Bandu, su mensili prus scritu in sadru de totu Sardìnnia
• Su giorronali QuestaSinnai, cun artìgulus in sadru custu puru
• S'Universidadi de sa de Tres Edadis, cun is cursus de sadru
• Is poesias in sadru de Gulliermu Piras, bincidoras in prèmius de totu Sardìnnia.