Is famìllias sinniesas tenint ogetus ki funt una sienda manna de stòria, de arti e de curtura. Po cumentzai, is prendas, allogadas beni e passadas de una genia a un’atra. In Sìnnia funt ogualis a totu is atras de sa Sardìnnia de bàscius e is ki s’agàtant de prus funt su butoni (su prus de is ‘ortas duus, po liai), sa cannaca e sa cadena. Sa cannaca est manna, de oru e po is fèminas, sa cadena est un’aciunta po su bistiri de is mascus.

In prus ddoi est su lasu, una prenda po is fèminas a forma de mariposa, ki s’agàtat is totu su logu mesuderràniu, prena de prelas e ki ddu ponint calendi de su tzugu acapiau a una feta de belludu.

Po su prus, is prendas funt de oru, traballau a filu arretrociu, girau a stringi una prela ki giai sempri est unu granau. Is afrorìgius funt a forma de frori, de steddu o a losanga.

Balint meda fintzas is arrobas, cun grandus bistiris po fèminas, ki a bortas ddus impèrant oindi’ e totu, e cun su su strex’‘e fenu, ki s’abilesa de is fèminas sinniesas nd’at fatu ogetus de arti ki ddus tenint e ddus cìrcant in totu su Mundu.

Iat a srebiri a fai bessiri a pillu fintzas is càscias, de linna de nuxi e de castàngia, ki fiant sa mobìlia de is domus sinniesas antigas imparis cun is sprigus, is cuadrus, is mesìllias, is parastàgius e is cadiras.

S’agàtant fintzas ainas po andai a cuaddu, fusilis antigus e ainas po traballai ki iat a srebiri unu museu ennogràfigu.

Unas cantu famìllias tenint arcivus privaus cun autus fintzas de su Cincuxentus e de su Sescentus, ki agiùdant custus puru a fai sa stòria de sa bidda.