Su sartu de su Comunu de Sìnnia est mannu 22.338 ètarus e pìgat prus ki atru Serpeddi’ e Seti Fradis, ma Solanas puru, cun 258 ètarus. Genti bivit fintzas a Santu Gragòriu, artziendi a Seti Fradis, e a Tasonis, artziendi a Serpeddi’.

Sa bidda de Sìnnia est a 133 de metrus de artària (a su Comunu bèciu) e totu a parti ‘e Scurigadroxu de su sartu, aici arresurtàt a 13 kilòmetrus sceti de Casteddu. Su sartu de Sìnnia est a làcana cun su sartu de Mara, Cuartùciu, Sètimu, Soleminis, Partiolla, Biddesartu, Brucei, Santu ‘Idu, Castiadas e Crabonaxa.

Su fatu ca is bixinaus nous funt in is cùcurus at fatu de manera ki s’artària mesana de bidda siat prus arta, cun diferèntzias fin’‘e de cincuanta metrus.

Is montis prus artus de Sìnnia funt Serpeddi’, cun 1.067 metrus, e is puntas a canta cumenti Serpeddieddu, Niu ‘e Crobu e Tronu, a milli metrus issus puru. Pagu pagu prus abàscius faci a Sìnnia ddoi est Tratzalis a 922 metri.

In Seti Fradis, su prus artu est a Punta Sa Ceraxa, a 1.023 metrus, e pagu pagu prus abàscius faci a mari ddoi funt Mont’‘i Ecas, a 918 metrus e Mont’Arbu a 808 metrus.